Trala vitoria acadada na cancha de Ushuaïa Eivissa, o Rotogal Boiro Voleibol regresa este sábado 20 á fortaleza da Cachada, onde recibe ao sete da tarde ao Léleman Valencia.
Marcelo ChinoBenavídez, adestrador dos boirenses, confía no apoio da inchada para sumar o terceiro triunfo consecutivo: “A afección do Rotogal paréceme espectacular. Os días que xogamos en casa, a cancha transfórmase no mismísimo inferno. Eu, se fose adestrador de calquera outro equipo, preocuparíame, porque, neste inferno, o amo é Rotogal Boiro”.
Sobre o Léleman Valencia, rival deste sábado, o preparador advirte que “todos os partidos hai que xogalos. Valencia é un club con moi bos xogadores. Reforzáronse e creo que, aos poucos, van ir atopando a forma. Hai que respectalos, xogar e ver como son os resultados”.
O Rotogal Boiro Voleibol contará, en principio, con todos os seus xogadores para o partido do sábado.
“Estamos moi contentos e con moitas ganas tras vencer en Eivissa. Atopámonos ademais máis relaxados, porque a pasada xornada tivemos unha moi boa actuación, o equipo xogou a moi bo nivel e iso dános moita tranquilidade”, engade o adestrador.
O adestrador Marcelo Benavídez nunha imaxe de Canal Barbanza