A Asociación Amicos deu comezo esta semana a unha nova experiencia de coñecemento, solidariedade e intercambio cultural: un Erasmus+ Discover con 11 persoas menores de 30 anos de Italia e Grecia. A experiencia ten unha duración de seis días completos de actividades para coñecer o patrimonio natural e cultural de Galicia e, en particular, do Atlántico. Así mesmo, os mozos levan xa días compartindo ideas e recursos cos integrantes de Amicos, chegando a coñecer de primeira man o Centro de Atención Integral da entidade en Boiro.
O grupo estivo composto por 6 mozos gregos e 5 italianos, que tiveron a oportunidade de visitar durante estes días diferentes enclaves do Barbanza de relevancia natural, paisaxística, histórica e cultural, como o Faro e as Dunas de Corrubedo ou o Miradoiro da Curota.
Tamén, alén da nosa comarca, puideron coñecer o Dolmen de Dombate, así como a zona de Fisterra, Combarro, e a cidade de Pontevedra.
Todas as actividades estiveron acompañadas pola gastronomía tradicional galega.
Ademais, as e os participantes aproveitaron a súa estadía para unirse ao proxecto RE-MAR a través da limpeza da praia de Cabodeiro, na illa de Arousa, celebrada durante a mañá deste xoves 18 de novembro. Xunto a 19 escolares do colexio CEIP Torre Illa e integrantes de Amicos, dedicaron a xornada a recoller máis de 23 quilogramos de residuos mariños, que o mar deposita no areal. Esta actividade contou coa colaboración de Conservas Antonio Pérez (Pan do Mar) de Vilanova de Arousa.
Na tarde deste 18 de novembro, os mozos visitarán a Cidade da Cultura de Galicia, o centro histórico e máis a Catedral de Santiago.
Fabritzio, coordinador do grupo italiano, destacou que está “moi contento” por poder vivir esta experiencia de integración con persoas con discapacidade e que está desexando que os membros de Amicos coñezan Italia, país que xunto con Grecia, será o vindeiro destino deste programa de intercambio de experiencias.