A Xunta traslada ao Concello do Son a colaboración do IGVS e Xestur no pulo ao parque empresarial

O director xeral do Instituto Galego da Vivenda e Solo, Heriberto García Porto, mantivo este 4 de novembro unha reunión co alcalde de Porto do Son, José Luis Oujo, na que tamén participou a tenente de alcalde, María Maneiro. Na xuntanza falaron dun dos programas dirixidos aos concellos galegos para rehabilitar inmóbeis de titularidade municipal e facilitar vivenda pública en alugueiro, como é o Fondo de Cooperación. García Porto comprometeuse a colaborar co Goberno local en materia de vivenda e solo empresarial.

García Porto recordou que o Executivo decidiu recentemente duplicar o capital do Fondo de Cooperación ata os 20 millóns de euros, “grazas aos que poderá seguir facilitando créditos sen xuros aos municipios que desexan executar actuacións de conservación e rehabilitación de inmóbeis municipais”. Amais, tamén debullou os detalles dun novo programa de préstamos de apoio ás entidades locais –dotado con 3 millóns de euros-, que terá un funcionamento similar ao Fondo de Cooperación; pero no caso concreto desta nova iniciativa o fin será facilitar aos concellos a liquidez necesaria para promover ou comprar vivendas de nova construción dirixidas a alugueiro social.

Outro dos puntos abordados na reunión foi o desenvolvemento dun parque empresarial por parte do Concello. Nese sentido, o director trasladou o seu compromiso de que o IGVS e a empresa pública Xestur “prestarán o apoio técnico para que desenvolva esta actuación no momento no que conclúa a tramitación dunha modificación do seu plan xeral, para adaptar o futuro polígono ás necesidades actuais”.