O alcalde da Pobra, Xosé Lois Piñeiro, mantivo este xoves 18 de novembro unha xuntanza de traballo co delegado da Xunta na Coruña, Gonzalo Trenor, quen lle presentou ao rexedor unha proposta de convenio que permitiría levar a cabo unha mellora integral do Centro de Saúde no concello.
Segundo fixo saber Trenor, o orzamento previsto é de algo máis de 45.000 euros e sería financiado a partes iguais pola Xunta e polo Goberno local “ao tratarse dun edificio de titularidade municipal”. Pola súa parte, o Concello será o encargado de levar a cabo as actuacións necesarias para a correcta execución das obras coa redacción do documento técnico necesario para a execución das obras, licitación e execución das mesmas.
A Xunta elaborou a proposta de convenio tras o informe das necesidades do edificio presentado polo Concello. Segundo fixo saber Trenor, “o Goberno galego coordinaríase coa Administración local para non interromper a prestación sanitaria durante o desenvolvemento das mesmas, garantindo en todo momento a calidade asistencial dos veciños asignados a este centro”.
O delegado da Xunta repasou co alcalde o informe no que se reflexa a necesidade de levar a cabo esta actuación “porque o edificio require dunha serie de actuacións para o acondicionamento e melloras das súas instalacións que se foron deteriorando co paso do tempo”.
O representante do Goberno galego puxo en valor este investimento para “mellorar a calidade asistencial do Centro de Saúde e para facilitar o seu uso por parte dos veciños e destacou o esforzo inversor por parte da Xunta para acondicionar o edificio municipal no que se presta o servizo sanitario aos veciños da Pobra”.