A Semana contra a Violencia de Xénero en Dodro inclúe actividades nos centros escolares e no Centro de Día

Con motivo da celebración do 25-N (Día Internacional contra a Violencia de Xénero), o Concello de Dodro impulsou un programa de actividades en diferentes emprazamentos do termo municipal, dirixidas a sensibilizar á poboación sobre a importancia de pechar fileiras fronte a esta lacra social. As accións da Semana contra a Violencia de Xénero celebraranse dende o 18 ao 25 de novembro, dirixidas á poboación en xeral pero poñendo o foco nos escolares e nos maiores, de aí que o Concello incluíra os centros escolares e máis o Centro de Día entre os escenarios destas actividades.

En concreto, repartiranse guías de uso non sexista na linguaxe no CPI Eusebio Lorenzo Baleirón e levarase a cabo contacontos pola igualdade e contra o maltrato na Escola Infantil, no CRA e no Centro de Día.

O 19 de novembro o salón de actos do Centro de Día acollerá o espectáculo teatral Soa, a partir das 20.00 horas.

O 20 de novembro celebrarase a terceira Andaina contra a violencia de xénero (saída ás 16.30 horas dende Bexo e Lestrobe até o Concello).

O Concello lembra que será necesaria a inscrición para a andaina e a obra de teatro. Pode facerse a través do teléfono 981 80 24 66.

Darase peche a esta iniciativa co manifesto contra a violencia de xénero no acto institucional do 25 de novembro, ás 12.00 horas diante da Casa do Concello.