O alumnado de secundaria de Ribeira comeza a visitar a mostra sobre Carvalho Calero no porto

O paseo do Malecón de Ribeira deu acubillo na mañá deste 13 de outubro á primeira das visitas guiadas que o alumnado de bacharelato do IES Número Un de Ribeira fai á exposición ao aire libre que sobre o escritor Ricardo Carvalho Calero (homenaxeado nas Letras Galegas en 2020) está a exhibirse neste enclave ata o 17 de outubro.

Concretamente, ás nove da mañá achegouse un grupo de primeiro de Bacharelato, en tanto que mañá á mesma hora fará o propio un segundo grupo e o venres acudirán outros dous, ás 9 e ás 13.45 horas.

Esta iniciativa foi idea do Servizo de Normalización Lingüística que se puxo ó dispor dos centros de ensino de Ribeira para realizar estas visitas. O obxectivo é que os mozos e mozas coñezan dun xeito ameno a figura de Carvalho Calero, a súa xuventude, a familia, o galeguismo, a guerra e os seus estudos e significación do mundo galego e da lusofonía.

Tras rematar a actividade entregouse ao centro un exemplar cedido pola Deputación da Coruña para os fondos da súa biblioteca. Recibiron a publicación en banda deseñada Ricardo Carvalho Calero. Coraçom de terra, de Xico Paradelo, Irene Veiga e Iván Suárez e Certificar a historia. Escritos sobre Carvalho Calero de Pilar García Negro, na que se aborda a obra do autor homenaxeado nas Letras Galegas de 2020.