O grupo do Partido Popular na Deputación da Coruña vén de mostrar o seu rexeitamento por como se están a desenvolver as entregas de axudas do Plan Reactiva 2, impulsadas polo Goberno da entidade provincial. Segundo fixo saber o grupo nun comunicado, a Deputación está a gabarse polo pago do dito programa de axudas cando “aínda non abonou aos destinatarios as contías do anterior programa”.
Os populares lembraron que xa levan tempo solicitando “unha maior axilidade e rapidez no proceso de tramitación de todas estas axudas debido a situación de emerxencia e necesidade económica que provocou a pandemia da COVID-19”, e ademais cargaron contra o Goberno provincial por ter, nas súas palabras, “completamente abandonados”aos negocios que resultaron beneficiados do primeiro plan posto en marcha pola Deputación da Coruña”.
E engaden: “Aplaudimos que o Executivo tomase nota das peticións que levamos tempo reclamando dende o noso grupo maioritario. Somos os primeiros que urximos a este Goberno a que pague canto antes unhas axudas que son vitais para a supervivencia do tecido económico da provincia”, subliñou o viceportavoz popular Evaristo Ben. Malia isto, o grupo insiste para que a Deputación da Coruña “actúe coa mesma dilixencia na tramitación e o pago das axudas do primeiro plan”. En palabras de Ben, “non ten sentido que uns negocios cobrasen nuns días e que aqueles que levan meses esperando aínda non recibisen os seus pagos”.