A Asociación Francisco Lorenzo Mariño, con sede en Aguiño, vai celebrar este ano o Día das Letras Galegas cunha festa cultural que será unha reivindicación do noso e, tamén, un xeito de sobrepoñernos da longa adversidade que, se todo vai ben, comezaremos a superar. A festa, programada para o luns 17 de maio no Conservatorio-Aula de Música de Aguiño, arrincará ás 19.00 horas. Será unha homenaxe a Xela Arias, a poeta distinguida este ano no Día das Letras Galegas, e tamén a todas as persoas que mantiveron aceso, nestes e noutros tempos, o lume da palabra.
Segundo explica a asociación, o formato será máis sinxelo có doutros anos, debido ás medidas de prevención contra unha COVID-19 que, cómpre non esquecelo, segue presente.
En concreto, consistirá nun espectáculo musical a cargo das contadoras Rilo & Penadique titulado Contos na punta da lingua. O espectáculo terá un aforo máximo de 65 persoas sentadas, separadas por convivintes previa confirmación de butaca tras solicitude no noso correo: aflm.aguinho@gmail.com ata data máxima o sábado 15 de maio ás 14 horas.
Debuxos para conmemorar as Letras
A asociación que leva o nome do benquerido párroco de Aguiño ten preparada algunha sorpresa a maiores para a rapazada, na celebración do 17 de maio. Así, todos os nenos e nenas que ese día leven un debuxo alusivo ao Día Letras Galegas recibirán como agasallo un peto azul cun debuxo alusivo a este día, á autora homenaxeada e á celebración da asociación. Os debuxos serán publicados posteriormente no perfil de Facebook da nosa entidade.
Do mesmo xeito, a organización recorda que todos os nenos e nenas participantes na actividade que a asociación organizou durante o confinamento (de marzo a xuño) baixo o lema #Euquedonacasa, e non o fixeran xa, poden recoller no C.C. Lustres Rivas de Ribeira o estoxo para mascaras conmemorativo das Letras do ano 2020 dos que xa se repartiron un cento.
Segundo engaden dende a asociación, “queremos festexar esta efeméride tan salientable para a cultura galega, a celebración das nosas letras, do noso idioma e a posta en valor da creación cultural feita en Galicia co espectáculo de Rilo & Penadique”.
E explican tamén: “Dadas as circunstancias non podemos celebrar un gran evento, como levamos facendo dende o ano 2006, con xogos populares, inchables, lambetadas e xornada de debuxo amais de espectáculo, pero si doutra maneira podemos organizar un acto que non pase desapercibido para que unha vez máis o Día das Nosas Letras teña lugar en Aguiño”.
Para esta actividade a asociación conta coa colaboración da Concellería de Cultura de Ribeira e da Deputación da Coruña. “Queremos facer un chamamento a participar na actividade e agradecemos a comprensión nos límites establecidos polo protocolo fronte ao COVID-19 pero seguiremos apostando por crear cultura, #CulturaSegura”, engaden.
Sinopse do espectáculo Contos na punta da lingua de Rilo & Penadique
No 2017 xuntáronse o amor pola literatura e a palabra dita co amor pola música e o universo da infancia, e nace de parto natural Rilo&Penadique. Elas narran, cantan e musican contos escoitados nalgún lugar ou escritos nalgún libro, nacidos dende o ser. Fusionan o mundo da nenez coa palabra e a música dando lugar a espectáculos de narración oral para bebés, rapazada e público familiar. Sonsoles Penadique leva a parte musical e Vero Rilo a narración oral.
Presentáronse na escena galega co espectáculo-obradoiro para bebés e familias Arre Ru, e pouco despois afianzáronse como dúo coa proposta para público familiar O pozo das señoras. Pouco despois saíron de Galiza para explorar novos mundos.
Ata a data acumulan novos títulos: A formiga no carreiro, Barrococó, Derriba da lúa, Historias con susto para durmir a gusto…Recentemente deron o salto ao público adulto co espectáculo Arrolando as Frores e seguen xirando con Lavandeiras.
A duración do concerto é de 55 minutos aproximadamente co obxectivo de que as familias gocen e axudan a cantar e xesticular; tratase dun espectáculo infantil e familiar en lingua galega.
