Esta fin de semana Ribeira vai acoller en diferentes emprazamentos tres actividades culturais de balde. Serán tres citas seguras, unha presentación literaria, un contacontos e un espectáculo familiar, nas que se aplicarán as máis estritas medidas para garantir a seguridade das e dos asistentes. A primeira en celebrarase será a presentación da novela Celada, este venres 30 ás 20 horas no Auditorio Municipal. A novela, escrita polo ribeirense Antonio Piñeiro, foi a gañadora da sétima edición do Certame Internacional de Novela Curta Cidade Centenaria de Ribeira.
E xa dentro da programación do Maio Cultural (en breve se dará a coñecer o calendario completo) haberá dous eventos o sábado 1 de maio. Por unha banda, ás 12 horas no Centro Cultural Lustres Rivas desenvolverase unha función contacontos, a sesión Contos para derreter cera, de Alba Grande, dirixida a nenos e nenas a partir dos 3 anos. As reservas débense formalizar enviando un correo a normalizacion@ribeira.gal indicando nome, apelidos, teléfono e relación de convivintes.
E ás 19 horas no pavillón de Palmeira Alcalde Torres Colomer ofrecerase o espectáculo familiar O Conto de Barriga Verde, de Fran Rei, e especialmente destinado tamén aos nenos e nenas maiores de 3 anos. Ao igual que no caso anterior, as persoas interesadas deberán formalizar a súa reserva a través de normalizacion@ribeira.gal indicando nome, apelidos, teléfono e relación de convivintes.
Láser tag
Por outra banda, Cultura do Concello de Ribeira lembra que proseguen as partidas de láser tag nas parroquias que organiza a Concellería de Xuventude: o sábado 1 de maio terán lugar en Olveira e o domingo 2 en Castiñeiras. O prazo de inscrición está aberto na Oficina de Atención Cidadá (OAC), no teléfono 981 835 417, extensión 10272, ou no correo electrónico xuventude@ribeira.gal.
