O Concello de Outes confirmou estes días a rotura da balaustrada do Parque de Vista Alegre, que apareceu esnaquizada a pasada fin de semana nun dos seus laterais. O Goberno local e a veciñanza nas redes sociais cualificaron os feitos de “comportamento incívicos que cómpre erradicar, posto que prexudican a todas e todos”.
E máis tendo en conta que o Parque de Vista Alegre foi e é unha das grandes apostas ambientais e de lecer do Concello e a veciñanza de Outes, que forma parte dun proceso integral para recuperar a contorna do río Tins: máis de mil metros de espazos naturais recuperados con zonas de lecer, parques infantís, sendas peonís e árbores autóctonas. Hoxe en día é unha das principais áreas de esparcemento dos residentes na Serra e na contorna da vila.
