Incautadas en Ribeira dúas lanchas habilitadas para o narcotráfico

Axentes da Policía Nacional adscritos á Comisaría de Ribeira, veñen de incautar nunha nave de Ribeira dúas lanchas preparadas para, segundo fixo saber o corpo policial, “o seu uso en operacións de narcotráfico”. Asemade, a Policía Nacional sinalou que unha das embarcacións tiña instalados dous potentes motores, e á outra de 15 metros de eslora podíanselle axustar até catro motores.

A nave na que se acharon as embarcacións dispuña de servizo de vixilancia, e atopábase “situada estratexicamente”, sinalaron os axentes do destacamento de Ribeira, engadindo que dispuña tamén dunha rampla con acceso directo á ría de Arousa. Ademais foi intervida unha carretilla elevadora para o manexo das embarcacións.

Os efectos incautados foron postos a disposición do Xulgado de Instrución en funcións de garda de Ribeira. Continúase coas xestións de investigación e non se descartan detencións.