Usuarios do taller de carpintería da Unidade de Atención a Drogodependencias (UAD) de Ribeira principiaron esta semana unha actuación destinada a restaurar o paseo de madeira situado no Carreiro e A Catía, na parroquia de Aguiño.
Os traballos están dirixidos polo profesor do obradoiro, Manuel Casais, e están sendo efectuados por oito persoas. Arrancaron xunto ao campo de Fútbol da Tasca e dende aí se irá reparando a estrutura en dirección ao río Listres. Estímase que se estará actuando na zona ata principios do mes que vén.
Ademais de favorecer a integración dos usuarios, estes labores reverten en beneficio da comunidade, tal e comp aconteceu con outras iniciativas recentes como a rehabilitación do barco da rotonda de Xarás ou a mellora da sinalización na illa de Sálvora.
