Os empresarios de Ribeira transmitirán as súas demandas á Deputación con motivo da apertura da Feira do Pequeno Comercio

Presentación da nova edición da Feira de Inverno do Pequeno Comercio

A Asociación de Empresarios de Ribeira celebra este venres 5 de febreiro unha xuntanza co deputado provincial Blas García Piñeiro, con motivo da inauguración da IX Feira de Inverno do Pequeno Comercio, un evento que conta co apoio da entidade coruñesa e do Concello de Ribeira e que abre as súas portas este venres ás 10.00 horas precisamente.

A feira ficará activa ao longo da fin de semana en horario ininterrompido, na praza do Concello, con vistas a favorecer a afluencia de visitantes.

Na reunión os empresarios ribeirenses transmitirán ao deputado as súas expectativas sobre o futuro do sector comercial e hostaleiro do concello e mostraranlle as súas principais demandas e necesidades. Tamén está previsto que lle acheguen o seu punto de vista sobre a estrada de titularidade da Deputación da Coruña que dará acceso ao futuro polígono de Ribeira.