O director xeral de Defensa do Monte, Manuel Rodríguez, e a directora da Axencia Galega de Innovación (GAIN), Patricia Argerey, participaron a semana pasada nunha actividade para coñecer de primeira man as novas posibilidades que ofrecen os vehículos aéreos non tripulados (UAVs) na loita contra os incendios forestais. A cita foi no Polo Aeroespacial de Galicia, no aeródromo de Rozas (Castro de Rei, Lugo).
Ambos directores presenciaron unha demostración do uso de drons para complementar o despregamento territorial do Servizo de Prevención e Defensa contra Incendios Forestais da Xunta. O obxectivo é empregar estes vehículos para mellorar e modernizar o operativo e a súa eficacia en ámbitos como os tempos de reacción ou a organización do dispositivo. Os drons, explicaron no acto de demostración, “ofrecen claras vantaxes no relativo á optimización dos procesos de toma de decisións no escenario dos lumes de última xeración (de maior virulencia e que afectan á interface urbano-forestal), dentro dunha estratexia xeral de mellora global da eficacia do servizo”.
Na sesión tamén se fixo saber que estes aparellos xa se están a empregar en tarefas de vixilancia, disuasión e como apoio á extinción de lumes. A diferenza é que agora avalíase a posta en marcha de novas funcionalidades e aplicacións que amplíen os horizontes dos drons na loita contra o lume. Neste senso, os directores xerais puideron comprobar como algúns dos vehículos máis avanzados nas Rozas teñen aplicacións, ademais de nos labores xa mencionados, no control dos permisos de queimas de restos agrícolas e forestais, así como na supervisión de indicadores ambientais para o establecemento do Índice de Risco Diario de Incendios (IRDI), entre outras moitas funcionalidades.
Os responsábeis de Defensa do Monte e de GAIN salientaron “as oportunidades que ofrece o uso de drons na loita contra o lume e reiteraron o compromiso da Xunta a prol do aproveitamento destas tecnoloxías tamén no que atinxe a outros ámbitos, como o das estatísticas forestais, o inventario, o sistema de información sobre os montes ou a sanidade forestal”.
