Este 26 de marzo, venres, vaise presentar na Casa da Cultura de Porto do Son o libro Vida e traballo no mar dos galegos, de Francisco Calo Lourido (Porto do Son, 1948). A cita será ás 20.00 horas e contará coa presenza do autor e máis de Pastor Rodríguez, coordinador da Asociación Cultural Barbantia, Pilar Sampedro, vogal de Barantia e Luis Oujo, alcalde de Porto do Son. A presentación vén da man de Barbantia, La Voz de Galicia e o Concello de Porto do son.
As persoas interesadas en acudir á cita, que se vai desenvolver baixo as máis estritas medidas anti-COVID, deberán reservar antes do venres a súa localidade a través da conta barbantia@barbantia.es.
Polo que respecta a Vida e traballo no mar dos galegos, é unha obra de investigación histórica e etnográfica que forma parte da serie dos Manuais do Museo do Pobo Galego. Trátase dunha exhaustiva pescuda pola costa galega dende Ribadeo até o esteiro do Miño, percorrendo as orixes das primeiras comunidades de mariñeiros, o papel dos mosteiros ou a chegada dos fomentadores cataláns e vascos.
O sonense Francisco Calo é licenciado en Filosofía e Letras e Doutor en Xeografía e Historia pola Universidade de Santiago. Catedrático de Xeografía e Historia, foi director de varios institutos, ensinando actualmente no IES Torrente Ballester de Pontevedra. Impartiu clases nas universidades de Santiago e do Porto e foi bolseiro de Formación de Persoal Investigador do CSIC. Recibiu o premio de investigación Antón Losada Diéguez (1995 e 2011), o colectivo Otero Pedrayo (1979) e varios premios á creación literaria. Patrón do Museo do Pobo Galego, do que foi secretario da xunta reitora, é correspondente da Real Academia Galega e membro da Sociedade Portuguesa de Antropologia e Etnologia, etc.
