O Museo do Gravado de Artes (Ribeira) vai inaugurar este venres 5 de marzo a exposición en homenaxe ao artista Manuel Ayaso Dios (Aguiño, 1934). O acto oficial de apertura da mostra comezará finalmente ás 17.00 horas (e non ás 13.00 horas, como indicamos erroneamente os días pasados) na sala 0 do dito recinto expositivo. Contará coa presenza do presidente do Museo e alcalde de Ribeira, Manuel Ruiz Rivas, do vicepresidente, Javier Expósito Paradela, e do director Xoán Pastor Rodríguez Santamaría.
A exposición consta de 110 punta seca orixinais inspiradas na obra do artista checo Franz Kafka e que ocupan dúas das salas do Museo do Gravado. Acompaña a mostra a edición dun libro para bibliófilos en edición limitada a 26 exemplares (1 P.A., e 1/25 ao 25/25) numerados e asinados polo propio artista homenaxeado con textos de Felipe Senén, Eva Veiga e Xabier L. Marqués. O libro está recollido nun estoxo de madeira serigrafada e contén 110 serigrafías orixinais asinadas e numeradas por Manuel Ayaso e autentificadas ante o notario José Prieto Luengo de Boiro.
O acto realizarase respectando todas as medidas sanitarias de prevención contra a COVID-19.
