O Lustres Rivas albergará a exposición Flores Silvestres de Galicia a partir deste venres

O Centro Cultural Lustres Rivas de Ribeira vai celebrar dende este venres, 5 de marzo, unha nova exposición titulada Flores Silvestres de Galicia, elaborada por Constantino González Pérez.

Constantino naceu en Cenlle (Ourense) en 1950 e destaca polo impresionismo no óleo sobre lenzo cuns trazos sinxelos, harmoniosos, alegres, con moita luz e fáciles de comprender. A gran parte das súas obras pertencen a coleccións particulares e foron xa expostas en España e Portugal.

A exposición pretende amosar ao público as distintas flores silvestres de Galicia como o toxo, os pampullos ou os croques. Así, a mostra ten unha marcada vertente didáctica, xa que todas as pezas están realizadas en óleo sobre lenzo e contan cunha explicación sobre a historia desa flor: a súa orixe, propiedades, hábitat ou período de floración.

O acto inaugurarase o venres ás 19:00 horas e a exposición permanecerá aberta ata o 3 de abril de luns a venres de 10:00 a 14:00 horas e de 19:00 a 21:00 horas, mentres que os sábados o horario de visita será de 11:00 a 14:00 horas.