O Concello de Porto de Son quere converter o municipio nun referente en turismo sustentábel, ou sexa, rendíbel social e economicamente ao tempo que respectuoso e beneficioso co medio ambiente, a paisaxe e a historia do territorio. Por esta razón, o Goberno local quere pór en marcha novas experiencias para explorar e gozar do municipio. Farao ademais co engadido extra de ser un proceso participativo, aberto ao tecido produtivo.
O proceso constará de dous elementos fundamentais. Por unha banda unha liña estratéxica baseada na colaboración cos empresarios e empresarias locais vencellados ao sector turístico, “xa que eles son os primeiros anfitrións para visitantes e turistas durante as súas estadías”. Ademais, dende esta semana e até o vindeiro 4 de abril, poderán participar enviando a súa opinión a través dunha enquisa online que se lles remitiu por correo electrónico e que tamén está dispoñíbel online lista para ser cumprimentada.
A enquisa responde á intención do Concello de “realizar un diagnóstico do sector turístico local, así como a deseñar materiais de promoción turística que amosen ao turista a oferta sonense a través de diferentes experiencias vencelladas ao patrimonio natural e cultural”.
Para calquera dúbida as persoas interesadas poden contactar co equipo técnico do proxecto no teléfono 672 129 860 ou no correo electrónico experienciasportodoson@gmail.com.
