O Centro Cultural e Xuvenil de Muros acolle este sábado 20 de marzo (20.30 horas) unha función da nova produción de ButacaZero: o espectáculo 32m², unha traxicomedia sobre o confinamento. A creación da autora rianxeira Esther F. Carrodeguas e Xavier Castiñeira propón, no primeiro aniversario do encerro da pasada primavera, “unha ollada reflexiva e sandadora” sobre unha situación que marcou, e marcará, a toda a sociedade. A peza acompáñase de música orixinal de Rodrigo Cuevas.
Está interpretada por Xurxo Cortázar e Laura Villaverde e conta na dirección coa propia autora do libreto e máis con Xavier Castiñeira.
Argumento
Mar e Xan son unha parella fóra do común, coma todas. Viven tan tranquilamente no seu pisiño de 32m². A vida pasa e o mundo xira, volta e volta, coma un filete. Pero un día, o mundo esmendréllase. O que era unha Nación convértese nunha HiberNación e hai que facer todo o que di Simón. Mar non recoñece a súa vida. Xan non recoñece á súa parella. O mundo redúcese a catro paredes e xa ninguén entende nada.
En palabras da compañía ButacaZero, “32m² é un enredo co que todo o público se poderá sentir identificado, pois todos mercamos un chisco máis de papel hixiénico do habitual e todas tivemos que acabar por levantar as nosas propias alfombras para descubrir a merda que tiñamos debaixo dos propios pés.”
