A Policía Nacional detén en Ribeira a dous homes por tráfico de drogas

Axentes da Policía Nacional adscritos á Comisaría de Ribeira detiveron o pasado 27 de febreiro un mozo de 22 anos, nado e con domicilio en Ribeira, como presunto autor dun delito contra a saúde pública, na súa modalidade de tráfico de drogas.

O mozo, ao verse sorprendido, iniciou unha fuga nun vehículo polas rúas de Ribeira sendo interceptado por un vehículo policial. Ao ser rexistrado atopouse entre as súas pertenzas 22 gramos de heroína e 1.225 euros fraccionados en billetes de 50 euros, de 20 euros e 5 euros.

A segunda actuación desta semana sucedeu o 1 de marzo cando foi sorprendido un veciño de Ribeira de 43 anos ao pasar unha papelina a outro suxeito en vía pública, entregando á súa vez este diñeiro ao agora detido. Incautáronse tres papelinas de cocaína e 205 euros.

Ambas as actuacións son resposta aos dispositivos establecidos para a prevención do tráfico de drogas na localidade de Ribeira.

Tras tramitarse as correspondentes dilixencias policiais, os detidos foron postos a disposición do Xulgado de Garda de Ribeira.