A Deputación flexibiliza o pago dos tributos municipais que xestiona, que poderán dividirse en 10 mensualidades

A Deputación da Coruña vén de anunciar unha flexibilización no pago dos tributos municipais que xestiona, que poderán dividirse en dez mensualidades, unha vantaxe clara para moitas economías que, até o de agora, estaban obrigadas a facelo ante a administración provincial nun único prazo e de xeito xeral. Estamos a falar dos impostos que o IBI (Imposto de Bens Inmóbeis) ou o IVTM (Imposto sobre Vehículos de Tracción Mecánica) que viñan sendo delegados, por moitos concellos, na Deputación.

Os contribuíntes interesados en acollerse ao pago a prazos poden solicitalo en liña ata o 30 de abril na Oficina Virtual Tributaria (OVT) ou de forma presencial en calquera das oficinas tributarias da Deputación

Ademais, tamén se establece a opción de pagar en dous prazos en período voluntario, para os contribuíntes que o prefiran.

“O noso obxectivo é dar as maiores facilidades á cidadanía para atender as súas obrigas tributarias nun contexto de dificultades económicas como o que atravesamos debido á pandemia”, afirmou o presidente da Deputación, Valentín González Formoso, que vén de asinar a resolución pola que se aproba esta nova medida e que hoxe se publica no Boletín Oficial da Provincia. Formoso lembrou que desde o inicio da crise da COVID-19, o Goberno provincial implementou “numerosas medidas para facilitar aos contribuíntes o pagamento dos impostos e tributos municipais”, como a suspensión de providencias de prema e embargos durante o Estado de Alarma ou a ampliación dos períodos voluntarios de pago.