A Asociación de Empresarios de Ribeira felicita ao Concello e á Policía Local pola rápida posta en marcha da patrulla anti-COVID

A Asociación de Empresarios de Ribeira fixo pública este martes a súa felicitación ao Concello “pola rápida posta en marcha da patrulla anti-COVID-19”, tal e como se comprometeu hai uns días, segundo indica a patronal, o Executivo local. A patrulla, destacan, estreouse no inicio da desescalada (esta última fin de semana de febreiro) e fíxoo realizando importantes labores de vixilancia para facer que se cumpriran as normas anti-COVID nos locais hostaleiros, tanto por parte da clientela como dos propios responsábeis dos establecementos.

A Asociación de Empresarios tamén felicitou aos axentes da Policía Local, por “esta tan necesaria actividade que desexamos sigan a desempeñar con celo e con firmeza en aras do ben común”. A entidade tamén salienta no seu comunicado a necesidade “de cumprirmos as normas entre todos”, hostaleiros, clientes e administracións, co fin de evitar novos repuntes de contaxios e que, tamén, “poidamos chegar o máis axiña posible ao remate da pandemia que tanto nos afecta”.

E conclúen: “Congratulámonos pola posta en marcha desta iniciativa e ao mesmo tempo recoñecemos ao Concello e á Policía Local a súa rápida resposta, animándolles para que sigan neste labor de control tan necesaria”.