Piden 3 anos de cárcere para un taxista por transferir case 36.000 euros desde a conta dun compañeiro ribeirense desaparecido


A Sección Sexta da Audiencia da Coruña, con sede en Santiago, xulgará o xoves a un taxista para o que Fiscalía solicita tres anos de prisión por supostamente transferir ao seu favor un total de 35.736 euros desde as contas de banca electrónica dun compañeiro que estaba desaparecido.

Dáse a circunstancia que o titular desta conta levaba desaparecido desde mediados do 2009 e un xulgado de Ribeira declarouno ausente en xullo de 2013.

O procesado realizou ” fraudulentamente” un total de 35 transferencias entre agosto do 2009 e abril do 2013. A Fiscalía considera que o acusado se valeu “da relación de amizade e de confianza”, así como “profesional” –ambos compartían o mesmo taxi– que mantiña o seu compañeiro, de modo que coñecía os seus números de conta.

A Fiscalía acúsalle dun delito de estafa e doutro de falsidade en documento público, polos que solicita unha pena de tres anos de prisión e inhabilitación especial para o dereito de sufraxio pasivo e multa de 12 meses con oito euros de cota diaria.

De igual modo, pide que indemnice ao representante do seu compañeiro –o declarado ausente– na cantidade total subtraída, á que hai que sumar os intereses legais.