O Concello de Ribeira fixo balance das obras realizadas na Casa da Cultura de Carreira, emprazada no lugar de Campos, co obxectivo de poñela a punto. En concreto, o inmóbel foi obxecto de traballos para acondicionalo e mellorar o seu desfrute por parte da veciñanza.
O Concello explicou que no que respecta ao seu local máis grande, con 293 metros cadrados de superficie, recibiu unha dobre man de pintura branca mate de alta calidade. Amais, engadiu o Goberno ribeirense, “dúas fiestras que estaban dispostas enriba do escenario foron cubertas con ladrillo cubo e quedaron recebadas por ambas caras”.
En canto ao local máis pequeno, actuouse nas tres xanelas das que dispón, “repoñéndose as cintas rotas, revisando os tiradores de peche e selándoas polo exterior para tratar de evitar a entrada de humidades”, explicou o Concello, engadindo que “tamén se eliminaron as manchas de humidade e esconchados que había nos teitos dos dous aseos existentes”.
Por último, na rampla situada a carón da porta principal colocouse un pavimento de goma adherida ao chan para aumentar a seguridade no acceso ao inmoble.
As obras foron executadas por Construcciones Aguiño S.L.