O Concello de Lousame confirmou a súa adhesión ao proxecto Xuventude activa no medio ambiente, un programa que, como se indica no seu nome, inclúe, poñendo o foco na mobilización-formación da mocidade, o desenvolvemento de obradoiros de reciclaxe e de análise da bolsa do lixo, así como actividades de limpeza, sensibilización e recuperación de espazos deteriorados en diversos sendeiros do municipio.
Tamén se propón a realización dun mural colaborativo antipolución, no que se empregarán produtos ecolóxicos e sustentábeis.
Para o desenvolvemento desta iniciativa o Executivo local solicitou a colaboración da Federación Española de Municipios e Provincias (FEMP).
Por outra banda, o Concello tamén presentou a súa solicitude para recibir a subvención do programa Corpo Europeo de Solidariedade a través do cal materialízase o proxecto de voluntariado europeo Actividades interxeracionais de voluntariado.
A previsión é que no vindeiro mes de abril Lousame poida acoller a dúas persoas de nacionalidade turca como voluntarias para participar en diferentes actividades do Concello ata finais de abril. Dende o Goberno local xa puxeron en marcha a tramitación deste proxecto no marco do programa de voluntariado europeo.
Teresa Villaverde, alcaldesa de Lousame, explicou que “unha das prioridades do noso Executivo sempre foi dinamizar o noso concello a través de actividades dirixidas á mocidade, así como aos máis pequenos e aos maiores. Pero ademais o noso obxectivo é que as propostas de acción estean ligadas aos recursos naturais de Lousame e ao potencial turístico, económico e cultural do noso concello. Estes dous novos proxectos responden a este compromiso”.
