O Goberno galego anunciou este luns 15 a licitación das obras para a construción do Punto de Encontro Familiar (PEF) de Ribeira, que contarán cun investimento de 156.000 euros, aos que hai que engadir outros máis de 150.000 euros anuais para o seu mantemento. Este punto, segundo explica a Xunta, “permitirá que as nais e pais separados ou en trámites de separación do Barbanza realicen as visitas que lles corresponden dun xeito seguro”.
Tamén fai saber que o procedemento “determina os requisitos técnicos que deberán reunir as empresas interesadas, que deberán presentar a súa solicitude para facerse cargo dos traballos”, ao que engade que o prazo de execución dos mesmos é de catro meses, polo que se estima que o centro estea listo para a súa apertura no último cuadrimestre do ano.
En palabras da Xunta, “será un servizo destinado a atender ás veciñas e veciños de toda a comarca, que agora se teñen que trasladar a Santiago para realizar estas visitas, convertendo o concello de Ribeira o primeiro de Galicia en contar cun Punto de Encontro Familiar fóra das sete cidades”. O Goberno galego ampliou nos pasados meses o horario de todos estes centros de cinco a sete días á semana para poder cumprir coas medidas xudiciais e atender os protocolos de prevención fronte á covid-19.
