Raquel Castro Pego, a prestixiosa violinista de Aguiño (Ribeira), amais de formadora e pedagoga, vai impartir este mes de febreiro unha serie de clases a novas promesas da música galega, a través do programa de formación permanente da Escola de Altos Estudos Musicais (EAEM), con sede en Santiago. As sesión desenvolveranse o xoves 26 de febreiro, de 9.30 a 14.00 horas e de 16.00 a 20.00 horas; e o venres 27, de 9.30 a 14.00 horas.
Ademais do alumnado da Escola, tamén poden asistir a estas clases músicos externos ao centro. Os interesados en participar nestas sesións poderán matricularse a través da páxina web da Escola.
Profesora de violín na Escola Superior de Música de Cataluña
Raquel Castro Pego naceu en Aguiño en 1972. Formou parte da Orquestra Xove de Galicia e na actualidade exerce como intérprete e pedagoga do violín. As súas recentes actuacións téñena levado, ademais de por toda España, a países como Gran Bretaña, Francia, Italia, Eslovenia, Croacia, Estados Unidos, Israel e a diversos lugares de Oriente Medio.
Recibe a súa formación en España e Londres, na Guildhall School of Music and Drama. Completa os seus estudos na Universidade de Indiana. Grazas a unha bolsa do Programa Fulbright consegue o Masters en Música coas máximas cualificacións, baixo a tutela do mestre Mauricio Fuks, do cal ten sido asistente.
Ten sido convidada a impartir clases na Universidade de Indiana e na Summer Festival Academy en Bloomington. En 2005 conseguiu a praza de primeiro violín solista na nova formación Ensemble Nacional Español de Música Contemporánea. É convidada nacional e internacionalmente para impartir clases maxistrais, seminarios e cursos de violín. Dende o ano 2004 é profesora de violín na Escola Superior de Música de Cataluña (ESMUC).
