A Policía Nacional detén en Ribeira a un home por un delito de tráfico de drogas

Axentes da Policía Nacional adscritos á comisaría de Ribeira veñen de informar da detención dun home de 54 anos de idade, veciño da localidade como presunto autor dun delito contra a saúde pública, na súa modalidade de tráfico de drogas.

Ao abeiro dun dispositivo para a prevención do tráfico de drogas en Ribeira os axentes detectaron ao presunto narcotraficante e sendo coñecedores de que fora detido en datas recentes por feitos semellantes, procederon a vixialo até que o viron intercambiando con outra persoa unha bolsa a cambio de diñeiro. Por este motivo procederon a intervir, identificando e cacheando a ambos.

Durante o rexistro, foille intervida ao detido una certa cantidade de cocaína amais de diñeiro en efectivo en billetes de diverso valor e un teléfono móbil, e ao comprador foille intervida a bolsa que intercambiara, que contiña cocaína.

Ao detido cónstanlle antecedentes por feitos similares.

Tras tramitarse as correspondentes dilixencias policiais, o detido foi posto a disposición do Xulgado de Instrución número Dous de Ribeira, en funcións de garda.