A Consellería de Medio Ambiente anunciou que vai convocar en breve unha orde de subvencións dotada dun orzamento de 1,7 millóns de euros para rehabilitar edificacións e vivendas de titularidade municipal con destino ao alugamento social.
Así o avanzou esta mañá a conselleira Ángeles Vázquez durante unha visita ao concello de Bande, en Ourense, un dos municipios que se beneficiaron nos últimos anos das axudas do Instituto Galego da Vivenda e Solo (IGVS) destinadas a facilitar e fomentar a nivel local este tipo de intervencións en materia residencial.
Ángeles Vázquez lembrou que nos últimos catro anos actuouse nun total de 125 vivendas en 40 concellos galegos, unha medida coa que se potencia o medio rural como lugar para vivir e, á vez, pretende servir de motor de reactivación económica para os concellos. As vantaxes deste programa tamén chegaron aos concellos da nosa comarca, por exemplo nun dos proxectos de rehabilitación e posta en valor arquitectónica máis destacados: a recuperación das Casas dos Mestres de Rianxo.
A conselleira tamén dixo que a través da nova orde introduciranse unha serie de melloras. Máis polo miúdo, estenderase o ámbito de actuación a todo tipo de vivendas de titularidade municipal en concellos de menos de 20.000 habitantes e ampliarase o importe máximo da axuda a percibir ata 50.000 euros por vivenda (só en caso de que o inmóbel a rehabilitar estea dentro dunha Área Rexurbe). A contía será de 48.000 euros para vivendas situadas nun ámbito histórico ou dos Camiños de Santiago.
