Durante o sábado continuará entrando o aire procedente do Ártico a Galicia. Con esta situación, agárdanse ceos con alternancia de nubes e claros no sur, con máis nubes canto máis ó norte, onde haberá chuvascos, que serán de neve por riba dos 600 metros. As temperaturas mínimas descenderán lixeiramente, polo que as xeadas serán xeneralizadas no interior, mentres que as máximas non terán cambios significativos. Os ventos soprarán de compoñente norte, moderados na costa e máis frouxos no interior.
O domingo non se agardan cambios significativos, cos ventos do norte que seguen traendo aire moi frío e chuvascos. Así, os ceos estarán parcialmente cubertos, con máis claros canto máis ao sur e máis nubes ao norte onde se rexistrarán chuvascos que serán de neve en cotas arredor dos 500-600 metros. As temperaturas non experimentarán cambios, con xeadas no interior. Os ventos soprarán de compoñente norte.
