As traballadoras do Departamento dos Servizos Sociais do Concello da Pobra do Caramiñal achegáronse na mañá deste 20 de xaneiro até as futuras dependencias onde desenvolverán o seu labor, situadas no andar baixo dun edificio fronte ao Consistorio. Fixérono acompañadas da edil da referida área, Amparo Cerecedo (BNG), Alí puideron comprobar in situ a evolución das obras do inmóbel que, segundo confirmou a edil, ficaría totalmente acondicionado en vindeiras datas. A previsión, dixo, é que abra súas portas á veciñanza da Pobra no mes de febreiro.
O local conta cunha superficie útil de 191’25 metros cadrados, artellados en varios espazos: vestíbulo, recepción, dous aseos, almacén, seis despachos, zona de espera e sala de reunións. Ademais, será accesíbel para persoas con mobilidade reducida e contará con entrada pola praza da Constitución.
A concelleira Amparo Cerecedo cualificou esta mudanza como “necesaria e urxente”, con vistas a aumentar os servizos da área e achegar unha mellor atención á veciñanza, “especialmente nesta situación derivada da COVID-19”. Ao mesmo tampo, apuntou que o traslado liberará espazo no Centro de Atención Integral á Discapacidade, posibilitando que as persoas usuarias do centro ocupacional pasen de recibir atención en liña (online) a que esta sexa presencial.
Cerecedo tamén salientou o factor “proximidade” do novo local en relación ao Consistorio, pois “resultará máis cómodo para a cidadanía no momento de realizar trámites, ademais de facilitar a interacción con outras áreas da Administración local”.
Nas ditas dependencias tamén se atopará o persoal adscrito á Concellaría da Igualdade.
O Concello asumiu os traballos de acondicionamento do local en alugueiro, nos cales proxéctase un sistema de compartimentación con barreira acústica, os acabados (logo de pintar e da colocación de zócolos), o establecemento da climatización mediante splits individuais, a instalación de iluminación para a nova disposición das estancias e a reforma do cadro existente por ampliación.
A obra está sendo executada pola empresa CYS Hispania S.L. e o importe ascende a 44.562’75 euros, IVE incluído, con cargo aos orzamentos municipais.
