A Deputación da Coruña apoia ao sector da cultura con axudas de máis de 5 millóns

A área de Cultura da Deputación destina este ano máis de cinco millóns de euros para contribuír á actividade cultural e profesionalización do sector a través de once liñas de axuda. Os prazos para a presentación das primeiras sete liñas de subvención estarán abertos ata o 19 de febreiro, e as outras catro que se completarán os vindeiros días estarán dispoñíbeis até o 25 de febreiro.

As liñas e subvencións están enfocadas ó apoio da cultura de base, á contratación de persoal técnico e aos sectores profesionais. Antes de rematar o mes de xaneiro, a Deputación terá abertas todas as convocatorias nas que as diferentes entidades poderán presentar a súa candidatura.

A Deputación da Coruña destinará, polo tanto, a entidades culturais unhas axudas para o desenvolvemento de actividades ou para a realización de investimentos que contan cun orzamento de 900.000 € e 300.000 €. Por un lado as entidades de natureza cultural poderán recibir axudas de ata 30.000 €, polos 10.000 € que serán concedidos para actividades culturais de entidades veciñas.

A convocatoria tamén está aberta tanto para actividades como para investimentos, para que poidan presentarse corais polifónicas, bandas de música populares, entidades de música e baile tradicional e formacións musicais de grande formato que contarán cun orzamento de 680.000 euros dos que 200.000 serán para investimentos. Neste caso as axudas serán dun máximo de 30.000 € para actividades e 15.000 € para investimentos.

Ademais, dúas das linas da área da Cultura da Deputación da Coruña busca a profesionalización do sector. Deste xeito, un orzamento de 200.000 € estará dispoñíbel para as asociacións de representantes, e 770.000 € axudar ós concellos na contratación de persoal técnico de Cultura. A convocatoria para esta última abrirá en días o prazo de presentación e prologarase até o vindeiro 25 de febreiro.