Rianxo vai comezar o ano con teatro familiar e con humor e fantasía para contrarrestar a adversidade. Así, este sábado 2 de xaneiro ás 19.00 horas a compañía Elefante Elegante estará na sala Arcos Moldes do Auditorio de Rianxo co espectáculo Patapatúm, obra gañadora do Premio María Casares, na categoría de Mellor Espectáculo Infantil 2019. A peza, de 45 minutos e destinada a público infantil e familiar a partir de catro anos, é unha das propostas da Rede Cultural da Deputación da Coruña.
Segundo puidemos saber a obra é un espectáculo de teatro visual sen palabras que inclúe música dixieland e máscaras e que basea a súa comunicación (estreita) co público a través da marcada expresividade dos personaxes. Patapatúm é unha obra que convida a reflexionar sobre o tempo, a nenez e os métodos que usamos para encher os baleiros das nosas ausencias.
