A subdelegada do Goberno na Coruña, Pilar López-Rioboo, supervisou este xoves 19 de novembro o resultado do acondicionamento realizado no acceso peonil á praia de Carnota. Acompañada polo alcalde Juan Manuel Saborido, o xefe da Demarcación de Costas de Galicia, Rafael Eimil; e a concelleira Mercedes Noceda, comprobou os traballos desenvolvidos na zona, impulsados pola Demarcación de Costas de Galicia (Ministerio para a Transición Ecolóxica e o Reto Demográfico) e executados pola empresa Tragsa.
As tarefas, que requiriron unha inversión de 38.000 euros, consistiron sobre todo na renovación da varanda existente no acceso central do areal, incluíndo a retirada da que se atopaba en mal estado e que foi substituída por unha delimitación máis transparente e flexíbel a base de corda. Tamén se procedeu á demolición e levantamento do tramo da varanda de madeira e a súa substitución por outra estrutura que permita unha mellor protección do sistema dunar.
