O Bloque Nacionalista Galego de Ribeira, a través do seu voceiro local Xosé Vázquez Cobas, dirixiu este mércores un chamamento ao Concello para instalo a habilitar un novo estacionamento de balde que dea servizo ás persoas que veñen doutros núcleos para facer as súas compras e recados na capital do municipio. Xosé Vázquez Cobas explicou que non é a primeira vez que o BNG rexistra iniciativas para dotar a Ribeira deste tipo de infraestruturas gratuítas, con “bo firme e iluminación”. Vázquez esgrimiu que na súa formación “sempre se apostou por aumentar o número de aparcadoiros gratuítos pero en condicións axeitadas”.
O Bloque acusou ao Concello de “dilapidar cartos públicos no alugueiro dunha parcela nas Abesadas, deixándoa sen arranxar e impedindo que poidan estacionar até 150 vehículos desde o ano 2018”. Os nacionalistas cualifican este feito de “vergoñento” e láianse de que non “se estean a paralizar estas e outras obras” a nivel local. Tamén criticaron ao Goberno local por ofrecer zonas de estacionamento sen iluminación que no inverno convértense en lameiras e no verán ínzase de lixo e maleza.
Por outra banda, Vázquez Cobas criticou a política do PP por “privatizar no seu día o aparcadoiro do Centenario provocando un encarecemento nos prezos e un caos na xestión, dixo, engadindo que a solución a isto sería “un aparcadoiro do Centenario con tarifas reducidas e bonificacións para aquelas persoas que mercan no comercio local”. Esta medida, finalizou Cobas, “permitiría axudar ao comercio local a mellorar as súas vendas e tamén se aumentaría o número de estacionamentos, algo moi necesario sobre nun momento tan delicado como o que están a pasar”.