Ribeira traerá un total de 10 representacións na Mostra de Teatro de outubro a decembro

11 Setembro 2020

O Auditorio Municipal de Ribeira dará cabida entre o 9 de outubro e o 12 de
decembro a unha nova edición da Mostra de Teatro de Ribeira: un certame que neste ano tan excepcional e para dar cumprimento á normativa covid estará limitado a 200 butacas en lugar das 279 de que dispón a instalación (é dicir, o 75% do aforo).

A concelleira de Cultura María Sampedro foi quen presentou hoxe a programación desta arraigada iniciativa, salientando que o Concello “segue apostando pola cultura segura” e que “o teatro o único que pode contaxiarnos é de cultura e coñecemento”.
Todas as funcións terán lugar os venres ás 21.30 horas agás a última, na que o Grupo Municipal de Teatro de Ribeira se subirá ás táboas un sábado: será o do 4 de decembro para poñer en escea a peza “O rei Telesforo busca noiva (e quere noivo)”:

“RELATOS NEGROS” Manuel Manquiña 9 de outubro

“POR VÍA ORAL” Dinamo Producións 16 de outubro

“SÓS” Malasombra 23 de outubro

“A PRIMEIRA VEZ” Talía Teatro 30 de outubro

“O MOZO DA ÚLTIMA FILA” Redrum Producións 6 de novembro

“OS NENOS DA VARÍOLA” Pérez & Fernández 13 de novembro

“CONCERTO CON-FUSIÓN” Píscore 20 de novembro

“SEREAS, DRAGÓNS E PISTAS DE BAILE” Avelino González 27 de novembro

“O MEL NON CADUCA” Ibuprofeno Teatro 4 de decembro

“O REI TELESFORO BUSCA NOIVA (E QUERE NOIVO)” SÁBADO: 12 de decembro Grupo Municipal de Teatro de Ribeira

Bonos a partir do luns
A venda das entradas e bonos terá lugar na Oficina de Atención Cidadá mediante pago con tarxeta bancaria, de luns a venres de 9.30 horas a 13.30 horas. A compra de bonos poderase facer dende o vindeiro luns 14 de setembro ata o 9 de outubro (ambos os dous incluídos ou ata encher o aforo) mentres que as entradas individuais venderanse dende o 5 de outubro e ata o 11 de decembro de luns a venres no horario indicado, de xeito que cada semana só se poñerán á venda as que correspondan ao espectáculo que terá lugar esa mesma semana.
O prezo individual da entrada para cada función será de 4€ e o bono para toda a mostra 25€. Neste último suposto, no caso de que un eventual endurecemento das medidas covid obrigara a reducir aínda máis o aforo se devolvería a parte proporcional do importe ás persoas afectadas.

Outros artigos

Publicidade

Revista en papel

Opinión