O BNG de Ribeira desprazouse este venres até o lugar de Couso, contorna litoral na parroquia de Aguiño de gran riqueza natural e paisaxística, para denunciar un problema que arrastra esta paraxe ambiental dende hai décadas: o problema da contaminación. Desta volta, a das verteduras e cheiros emitidos dende as fábricas emprazadas na contorna e a EDAR recentemente instalada na mesma (deseñada para unha poboación de 19.000 habitantes). Segundo o BNG, esta contaminación prexudica a calidade de vida dos veciños e mesmo os recursos dos que dependen as traballadoras e traballadores do mar.
O voceiro do BNG en Ribeira, Xosé Vázquez Cobas, sinalou que “en numerosas ocasións ao longo das últimas décadas, os veciños e veciñas reiteraron as súas queixas polos cheiros insoportábeis que padecen e que fan molesta, incómoda e insán a vida preto do lugar”. Vázquez lembrou “como o BNG se opuxo historicamente á instalación de industrias na zona e como a veciñanza chegara ao punto de recoller sinaturas solicitando que non se concedesen licenzas para industrias potencialmente contaminantes nese punto e na súa contorna”.
Vázquez Cobas tamén reflectiu as queixas do colectivo mariñeiro e mariscador, que teñen denunciado residuos no mar, coloracións na auga de procedencia industrial e presenza de verteduras de aparencia aceitosa. Segundo informan desde a formación nacionalista, “nas últimas semanas volveu a haber denuncias públicas desta situación que amosan non só ata que límite produce cansanzo na veciñanza do lugar senón tamén grande preocupación”.
Ante esta situación a deputada do BNG no Parlamento de Galiza, Rosana Pérez Fernández, anunciou a presentación de diversas iniciativas parlamentares para indagar se a Xunta é coñecedora desta situación e se ten pensado investigar e solucionar as verteduras que se están producindo ao medio mariño. Para a deputada nacionalista, “resulta sorprendente que ningunha administración teña tomado ata o de agora cartas no asunto e decidido investigar a procedencia tanto dos cheiros como das verteduras ao mar a pesar das queixas”. Segundo Pérez Fernández, “a situación é de especial importancia precisamente por tratarse dunha zona natural sensíbel e por ser unha zona de importante produción pesqueira e marisqueira, na que mesmo ten lugar un dos eventos gastronómicos de produtos do mar máis coñecidos e recoñecidos no país”.
