O Bloque Nacionalista Galego de Ribeira vén de mover ficha en contra da fenda dixital urbano-rural, ou sexa, a que marca distancias entre as cidades e o rural en materia de oportunidades para gozar dunhas telecomunicacións de calidades, vitais, hoxe máis ca nunca, para teleformarnos, teletraballar e comunicarnos. Concretamente, a agrupación rexistrou unha iniciativa plenaria que reflicte “as queixas recibidas de veciños e veciñas das parroquias para que o Concello de Ribeira non fique de brazos cruzados ante a falta de acceso de calidade á Internet nas zonas rurais do municipio”.
Para os nacionalistas a poboación que vive en zonas rurais “precisan contar con todos os servizos fundamentais de maneira igual aos habitantes que viven nos ámbitos urbanos, entre estes servizos non só está o saneamento, a auga, o lixo ou o alumeado senón que tamén é o acceso a Internet de calidade”.
O concelleiro Luís Pérez Barral engadiu que “o acceso a Internet é un dereito recoñecido pola ONU e debe ser garantido polas administracións públicas, sobre todo nun contexto no que a COVID-19 deixou patente a fenda dixital existente entre os veciños e veciñas que viven no rural, fronte aos que viven nos ámbitos urbanos”. Ante esta situación, o BNG esixe que o Concello de Ribeira inste á Xunta, ao Goberno do Estado e ás compañías telefónicas a que fagan o despregamento da fibra óptica en igualdade de condicións a toda a veciñanza que carece dela na actualidade.
