A soprano, artista e divulgadora noiesa Esperanza Mara vai recalar en Rianxo para impartir un obradoiro creativo para crianzas e familias: a actividade Xogando coa música, un convite, con formato de contacontos, a deixarse levar pola maxia da voz, dos instrumentos e da voz de cada quen.
Vaise celebrar ao abeiro do ciclo Xoves da Biblioteca. A actividade está prevista para este xoves 1 de outubro, ás 18.00 horas, e vén especialmente indicada para nenas e nenos de entre os 3 e os 8 anos. A entrada é de balde previa reserva na conta biblioteca@concelloderianxo.gal ou no teléfono 667 185 581. Organiza Cultura e Xuventude de Rianxo ao abeiro do programa autonómico Ler Conta Moito.
O miolo argumental da actividade é a historia dunha soprano que tivo a desgraza da que un rapaz se rira nela nunha actuación. Logo, coa axuda do polbo Neón e o peixe don Feixe consegue dar coa solución para volver cantar sen que lle importen as opinións dos demais.