Finalmente a edición número doce da Volta da Ons, unha das grandes regatas galegas, co engadindo extra de ter os puntos de partida e chegada na nosa comarca, vaise celebrar este sábado 26 de setembro, logo de que fose adiada o pasado día 5 por mor do forte vento do nordés. Así nolo vén de confirmar o Club Náutico Arousa Norte, organizador da clásica competición de vela galega, que conta co patrocinio de Atlantic Dental Institute e a Clínica López Castro.
Segundo lembra o Club da Pobra, a 12 Volta a Ons dá comezo á tempada outonal de cruceiros na ría de Arousa. Esta edición da clásica cita galega largará amarras desde as proximidades do porto da Pobra do Caramiñal ás 12.00 h e, segundo confirma a organización, está previsto que uns 15 barcos tomen a saída en representación de todos os clubs da ría.
O percorrido consistirá en virar varias balizas nas inmediacións da rada pobrense, antes de dirixirse a augas exteriores da ría para circunnavegar as illas de Ons e Onza e, finalmente, volver a unha liña de chegada na enseada da Pobra.
A inestabilidade e escaseza de vento poderían facer acto de presenza segundo as predicións que avisan de ventos do Norte duns 5 e 10 nós. Para iso o comité de regatas baralla diversas alternativas nos percorridos.