A ARE consegue o apoio de todos os partidos políticos locais para reactivar a economía rianxeira

18 Setembro 2020
Luis Duro, presidente da Asociación Rianxeira de Empresarios

A Asociación Rianxeira de Empresarios (ARE) convocou esta semana, o martes 15, unha xuntanza con representantes dos partidos políticos con representación local para avaliar conxuntamente a actual situación da economía do concello e traballar xuntos e en consenso a prol da recuperación. A xuntanza celebrouse no salón de plenos do Consistorio ás 20 horas e nela estiveron presentes o presidente, o vicepresidente e a técnica da ARE, Luis Duro, Diego Rodríguez e Ana Vicente. Por parte da Corporación municipal acudiron Adolfo Muíños e Xusto Xosé Ordóñez (BNG), Carmen Figueira e Francisco Javier García (PSOE), Mariano Moares (PP), Julián Bustelo e Julio Alcalde (Rianxo en Común) e Sara Resúa (Ciudadanos).

A ARE decidiu convocar esta reunión por mor da “necesidade de acadar consensos e unir esforzos ante a situación na que se atopa a economía local tralo impacto da crise sanitaria do COVID-19”. Segundo fixo saber a asociación, “a pandemia provocou unha situación de crise económica a nivel mundial que non vai ter unha recuperación fácil e que, coma sempre, se vai cebar coas micropemes e coa persoas traballadoras autónomas”.

Na xuntanza abordouse a necesidade de manter entre todos un diálogo construtivo destinado a fomentar a unión de esforzos comúns da ARE, do Concello e de todo o sector empresarial. Algúns dos temas que se trataron durante as 3 horas que durou a reunión foron: a necesidade de que se aprobe o PXOM, a situación na que se atopa o proxecto da ARE para crear no Parque Empresarial naves de alugamento (con prezos vantaxosos para pemes e micropemes) ou, tamén, a posibilidade de asentar no Parque unha segunda escola infantil que, segundo informou o alcalde, sería necesaria por existir unha lista de agarda de 18 usuarios na actualmente operativa. Para o devandito proxecto o Concello cedería unha parcela de uso público e a ARE, xunto con algunha outra entidade local, comprometeuse a estudar o financiamento do inmóbel e a posta en marcha da escola cunha axuda da Xunta.

En canto aos prezos dos alugamento dos baixos comerciais en Rianxo tódolos presentes coincidiron na necesidade de idear “medidas para fomentar a ocupación dos baixos baleiros” así como “para afinar os prezos do alugamento en beneficio do inquilino pero sen penalizar ao propietario”.

Asemade, destacouse a necesidade de traballar máis na dinamización e a promoción turística de Rianxo e de toda a comarca do Barbanza así como na de investir na formación do sector da hostalería para lograr unha maior profesionalización.

Por outra banda, púxose o foco na conveniencia de impulsar conxuntamente o directorio empresarial online e o marketplace rianxeiro, postos en marcha pola ARE e o Concello, informando aos presentes do estado no que se atopa dito proxecto e resaltouse que “a idea fundamental”, ademais de ofrecer maiores posibilidades de ventas para o comercio local, é a de “crear un escaparate virtual no que calquera veciño atope aquelo que precise e faga gasto nos negocios locais”. Así mesmo indicouse que a vindeira semana a ARE vai incorporar novo persoal, contratado

mediante unha subvención da Xunta, para traballar precisamente neste proxecto dixital.

Outros artigos

Este xoves arrinca a décima edición do Rexenera Fest

O certame Rexenera Fest 2024, o gran festival da arte pública de Galicia que chega á súa décima edición, celébrase en Carballo do 30 de maio ao 9 de xuño. Organizado polo departamento de Promoción Económica e Turismo do Concello carballés, volverá contar co apoio da...

+

Publicidade

Revista en papel

Opinión

“Cando existen intereses contrapostos na pesca”. Antón Luaces

“Cando existen intereses contrapostos na pesca”. Antón Luaces

Dicirmos que hai diverxencia entre o sector pesqueiro e os gobernos (autonómico e/ou central) non é descubrir, arestora, o Atlántico. Resulta tan evidente ese desencontro, que só a desunión permanente no eido da pesca marítima explica que o sector, en Galicia e as...