A Audiencia Provincial da Coruña con sede en Santiago xulga este mércores, día 8, a tres acusados de tráfico de drogas no municipio coruñés de Ribeira.
Os feitos remóntanse ao mes de febreiro de 2017, cando a Policía Nacional deu o alto a un vehículo en Ribeira no que viaxaban os tres acusados e que sospeitaban que podía levar droga. No interior do turismo localizaron unha caixa forte oculta con 1.659,90 euros repartidos en billetes e moedas, así como un móbil e unha tarxeta SIM e distintos efectos destinados ao tráfico de substancias estupefacientes.
En poder dun dos detidos atopouse caseque cen gramos de cocaína e dous móbiles. O terceiro dos acusados foi interceptado horas despois tras fuxir do lugar e levaba 206 gramos de haxix, 5,4 gramos de heroína e 0,8 gramos de cocaína. Así mesmo, no seu poder foron localizadas armas prohibidas. O fiscal considera aos tres acusados autores dun delito contra a saúde pública, mentres que a un deles atribúelle tamén tenencia ilícita de armas. Para dous solicita cinco anos de prisión e sete para o terceiro, así como o pago de 45.000 euros de multa.
