Comezaron en Ribeira os traballos para instalar media ducia de pantallas dixitais de gran formato noutros tantos recantos da cidade. Os dispositivos, que forman parte do novo Sistema de Cartelería Dixital de Ribeira, ofrecerán á cidadanía información municipal de interese, fomentando a participación, achegando datos locais actualizados e inmediatos e estreitando a distancia entre a veciñanza, por unha banda, e a actividade xerada polo Concello e as diversas entidades locais, pola outra.
Esta iniciativa, cuxo prezo de adxudicación ascende a 102.668,50 euros (IVE incluído), enmárcase dentro do programa EDUSI Máis Ribeira Atlántica 2020, financiado nun 80% polo Fondo Europeo de Desenvolvemento Rexional (FEDER) ao abeiro do Programa Operativo Plurirrexional de España (POPE) 2014-2020. Adscríbese á liña de actuación deste plan denominada Modernización da Administración e Smart Village Ribeira.
A empresa adxudicataria que se está a encargar da realización dos traballos é Sistemas Audiovisuales Itelsis, S.L..
Dos seis paneis informativos que se van instalar, tres van en interior (na Casa Consistorial, no Mercado Municipal e no Polideportivo da Fieiteira) e tres en exterior (do Concello, da Sala Museo Municipal e da Oficinal Municipal de Turismo).
Trátase de dispositivos de información de alta resolución e gran formato, intelixentes e conectados online mediante un reprodutor multimedia de contidos, con capacidade para transmitir fotos, vídeos, arquivos PDF, audio, redes sociais, páxinas HTML, etc…
Segundo informa o Concello, “con este sistema preténdese dispoñer dunha canle de comunicación para transmitir todo tipo de información sobre actividades culturais, campañas, eventos, feiras, lugares de interese para visitar… Do mesmo xeito, quere servir como un soporte para emitir información emanada dos propios cidadáns, como por exemplo eventos de asociacións, etc”.
A posta en funcionamento comezará en breve, unha vez técnicos do municipio reciban formación para a xestión deste novo servizo de información cidadá.
