O Servizo de Deportes do Concello de Rianxo ten aberto esta semana o prazo de inscrición para as as actividades deportivas municipais deste verán, un programa que, como era previsíbel, viuse modificado polas actual situación de risco sanitario, aplicando medidas que garantisen a seguridade das e dos participantes. Como novidade concreta, este ano aplicouse un número limitado de prazas para as actividades. Ademais, tampouco haberá sesións de iniciación deportiva. O prazo de inscrición remata o 9 de xullo.
A inscrición pode facerse na web do Concello (descargando a ficha para cumprimentar para logo presentala no Servizo de Deportes ou enviala por correo electrónico a deportes@concelloderianxo.gal) ou de maneira presencial na oficina do Servizo de Deportes. As actividades comezan o 13 de xullo e rematan o 28 de agosto.
As actividades son os seguintes:
· Escolas Deportivas: nenos/as nados/as no 2006 ao 2013 ambos incluídos, coa excepción de patinaxe que abranguería do 2006 ao 2015. Inclúense escolas de tenis, de patinaxe, de tecnificación multideportiva, de atletismo, de fitness infantil e de tríatlon.
· Actividades Adultos: nados/as con anterioridade ao 2006. Inclúense escolas de multifitness, ximnasia para maiores e escolas de tenis.
· Actividades Clubs Deportivos. Abrangue piragüismo (Club Piragüismo Rianxo), remo (Club de Remo Rianxo) e xadrez (Club Xadrez Rianxo).
