As nosas aulas son, cada vez máis, laboratorios-obradoiros de experimentación, con importantes colleitas anuais de contribucións innovadoras desenvolvidas pola comunidade de estudantes. Recoñecer estes importantes esforzos é o obxectivo dos premios aos proxectos de innovación tecnolóxica, científica e didáctica no ámbito da Formación Profesional que convoca a Consellería de Educación, que vén de dar a coñecer a resolución da nova convocatoria. En total, distínguese o traballo de 30 centros da nosa terra.
Inclúense na listaxe contribucións moi envorcadas no uso dos móbiles, como a do IES Félix Muriel de Rianxo, pola aplicación DiversidApp (unha ferramenta móbil de xestión doméstica e promoción da autonomía persoal para usuarios con diversidade funcional), ou a do CIFP Politécnico de Lugo, que achegou o proxecto Industria 4.0, unha app da Realidade Aumentada para o mantemento industrial. Tamén destaca o proxecto divulgador do CIFP de Coroso, en Ribeira, que contribuíu co deseño dun modelo a escala de unidade de tratamento de Ar (UTA) de baixo custo.
O obxectivo destes galardóns, que teñen unha dotación económica de 800.000 euros, é potenciar as iniciativas innovadoras, o traballo colaborativo e a transferencia de coñecemento entre centros educativos, empresas e outras entidades.
