O Goberno galego achega novas liñas de apoio á dixitalización por valor de 16 millóns

18 Xuño 2020

Craftsman Browsing Laptop Connection Technology Concept

O Goberno galego vén de anunciar tres liñas de apoio á transformación tecnolóxica por 16 millóns de euros, co obxectivo de “facilitar a reactivación post-COVID do comercio, dos autónomos e das PEME”. As axudas do programa dos cheques de dixitalización (7 millóns) e de Galicia Exporta Dixital (3,6 millóns) poderanse solicitar a partir deste venres 19. A vindeira semana activarase unha nova convocatoria das axudas á transformación tecnolóxica, dotada con 5,4 millóns de euros. As liñas anunciadas este xoves 18 están co-financiadas polo Fondo Europeo de Desenvolvemento Rexional.

Por obxectivos concretos, mentres o Galicia Exporta Dixital, que por primeira vez tamén se abre ao sector do comercio, promove a súa expansión internacional a través de novas canles de comercialización a partir de ferramentas tecnolóxicas innovadoras, os cheques de dixitalización teñen en conta “de maneira especial” as necesidades do tecido empresarial situado no ámbito rural, a economía social e o impulso do traballo a distancia, segundo informou a Consellería de Economía, impulsora das axudas.

Teletraballo e impulso do rural

Destinado a microempresas, entidades de economía social e agrupacións empresariais, o programa de cheques de dixitalización achegará axudas do 80% dos investimentos realizados por proxectos que teñan como obxecto a integración e posta en marcha de tecnoloxías dixitais para a adaptación á situación provocada pola COVID-19, como o teletraballo, as solucións de conectividade no eido rural, ou sistemas de notificación e de control sanitario e aforo, entre outros mecanismos.

Neste sentido, as axudas concédense en réxime de concorrencia non competitiva e os gastos realizados deberán ser dun mínimo de 1500 euros e un máximo de 12.000 euros. O prazo de presentación de solicitudes permanecerá aberto desde mañá ata o vindeiro 30 de setembro ou ata o esgotamento do crédito.

Internacionalización

No que respecta ao Galicia Exporta Dixital, a convocatoria que se abre conta cunha dotación de 3,6 millóns de euros, que se suman aos 2 millóns de euros da convocatoria anterior tamén activada este ano. Esta nova edición incorpora como novidade destacada que os comercios polo miúdo poderán acollerse ás axudas.

En definitiva, a través desta vertente de apoios, pemes e comerciantes poderán obter recursos de axuda para a realización de diagnósticos de potencial exportador; plans de internacionalización dixital multicanle; plans de mercados electrónicos concretos; a creación e adaptación de tendas en liña e catálogos en liña para a mercadotecnia e as vendas en mercados electrónicos obxectivo ou a adquisición de software específico, entre outros. As axudas, en concorrencia non competitiva, achegarán o 80% dos investimentos realizados e o prazo de presentación de solicitudes permanecerá aberto desde mañá ata o vindeiro 30 de novembro ou ata o esgotamento do crédito.

Outros artigos

“Día das Letras Galegas 2025”. Manuel Dominguez

Andrés do Barro, cantante, compositor de soul galego, grandes éxitos dende 1975 onde as linguas do Estado foron confinadas, censuradas, ata acadar o primeiro posto nas listas dos discos máis vendidos en España tres veces seguidas: primeiro en 1969 con O trem , logo en...

+

“O Barbanza: Cinco anos de xornalismo independente”

Hai cinco anos, en maio do 2019 nacía na súa edición dixital obarbanza.gal e uns días despois na de papel O Barbanza, sempre en galego e baixo a cobertura do Grupo Código Cero Comunicación. Dicíamos daquela que eramos un grupo de profesionais decididos a aventurarnos...

+

Día das Letras pasado por auga e temperaturas suben baixas

Continuamos durante o venres con inestabilidade atmosférica. Con esta situación, agárdanse intervalos nubrados con chuvascos acompañados de tormenta. As temperaturas continuarán sen cambios ou con lixeiros ascensos das máximas. Os ventos soprarán do noroeste, frouxos...

+

Publicidade

Revista en papel

Opinión