O Goberno galego vén de notificar a un total de 8 concellos, mancomunidades e consorcios da nosa comarca a súa inclusión nas axudas para proxectos de mellora de infraestruturas turísticas. A contía total destes apoios dirixidos a pór en valor a nosa destacada riqueza, cultural, patrimonial e paisaxística é de 175.000 euros. Inclúense dúas iniciativas en Boiro, unha en Outes, unha en Muros, unha en Carnota, unha en Noia, unha no Son e outra en Ribeira.
Sufragaranse, entre outras, accións de engalanamento dos accesos e bens declarados de interese cultural, iluminación ornamental, recuperación e creación de miradoiros paisaxísticos ou recuperación de elementos de interese etnográfico ou da arquitectura tradicional entre outras.
O obxectivo xeral desta liña de subvencións é “seguir impulsando Galicia como un destino fiábel e de calidade”.
No conxunto da provincia da Coruña notificouse a 53 concellos que son beneficiarios destas axudas cun orzamento que supera os 1,1 millón de euros.
Estes son os proxectos subvencionados da nosa área xeográfica:
· Adecuación de espazo destinado ao estacionamento de vehículos na praia de Barraña (Boiro)
23.526,57 €
· Sinalización destino Arousa Norte e panelización do percorrido terrestre que acompaña á Ruta Xacobea Mar de Arousa-Río Ulla (Boiro)
6.606,60 €
· Subministros para embelecemento e sinalización dos recursos turísticos de Carnota (Carnota)
30.000,00 €
· Mellora da accesibilidade á praia de Ventín, Abelleira (Muros)
25.717,27 €
· Substitución do sistema de alumeado público ornamental na igrexa de San Martiño de Noia (Noia)
11.231,22 €
· Sinalización turística dos recursos naturais e patrimoniais vinculados a rutas existentes no concello de Outes (Serra de Outes)
25.325,30 €
· Aseos adaptados e servizo de socorrismo na Praia de Ornanda (Porto do Son)
22.711,34 €
· Mellora da accesibilidade ao miradoiro da Pedra da Ra (Ribeira)
30.000,00 €