A Real Academia Galega de Belas Artes decidiu prorrogar ao 2021 as celebracións que ían ter lugar este ano con motivo do Día das Artes Galegas, dedicado nesta edición ao arquitecto ceense Domingo de Andrade, actividades que teñen como obxecto o estudo, a difusión e a posta en valor de canto significa a vida e a obra deste representativo arquitecto do barroco galego.
Ante a situación creada pola pandemia do COVID-19, a xunta de goberno da Academia reuniuse onte luns para tomar a decisión de aprazar a celebración do Día das Artes Galegas pola imposibilidade de seguir co seu programa de actividades e actos de celebración. O presidente, Manuel Quintana Martelo, destaca que, dada a importancia da figura de Domingo de Andrade nos ámbitos internacional e galego do Barroco, e co fin de non deslucir a súa homenaxe e poder desenvolver toda a programación de maneira correcta, a Academia acordou esta resolución. Ademais, o feito de ter xa aprazado o acto central de homenaxe do día 1 de abril, e previndo as enormes dificultades para a elección dun novo homenaxeado en 2021, animaron á Academia a prorrogar un ano máis a Domingo de Andrade.
O presidente anuncia que o 12 de novembro, data que coincide co aniversario da morte de Andrade, a Real Academia Galega de Belas Artes celebrará un acto na Catedral de Santiago para lembrar a súa figura e o esplendor da súa obra. Tamén entre o 16 e 19 de novembro, celebraranse diversos actos en Cee, organizados polo Concello aos que asistirá representación da Real Academia Galega de Belas Artes, e que estaban previstos con anterioridade.
“A extraordinaria anomalía deste momento púxonos na circunstancia de tomar as decisións que consideramos máis axeitadas para que ningunha daquelas figuras que esta Academia decida en pleno tomar como homenaxeada perda a dignidade da súa celebración, onde os seus distintos actos poidan dar fiel reflexo da importancia histórica da súa obra” –explica Quintana Martelo–.
