As bibliotecas municipais da nosa comarca abren esta semana as súas portas, aínda que coas limitacións propias dos tempos que estamos a vivir e con determinadas medidas destinadas a garantir a seguridade dos usuarios e do persoal. Polo que respecta á Biblioteca de Boiro, anunciou a súa apertura para este mércores, co fin de reactivar o seu servizo de préstamos aínda que en horario reducido. Esta mesma semana tamén abría a de Ribeira (de 9 a 14.00 horas de luns a venres), tamén con horario limitado e só para o préstamo e a devolución de de libros, con cita previa (a través do 981 835 650 e o correo ribeira.rbgalicia@eidolocal.es).
Tamén incrementaron a súa actividade as bibliotecas de Rianxo e A Pobra do Caramiñal, que xa viña sendo moi intensa durante as semanas da pandemia (achegando contos para nenas e nenos, recomendacións de lectura, recursos, guías e recordatorios de en que portas petar para que as lectoras e lectores confinadas/os puidesen seguir tendo acceso a novas obras online). A de Rianxo acompañou de máis contos virtuais a “desexada re-apertura”, esta semana, e a da Pobra fixo coincidir o regreso (este xoves 14, con servizos de préstamo baixo as consabidas medidas de seguridade) cunha achega importante de recursos para conmemorar o Día das Letras Galegas (este domingo 17 de maio, adicado a Ricardo Carvalho Calero), ao igual que o resto das bibliotecas dos nosos concellos.
