Esta semana prosegue nas parroquias de Rianxo o reparto de máscaras de protección contra a COVID-19 impulsada polo Concello e levada a cabo por Protección Civil e a Policía Local. A previsión é distribuír 10.000 elementos de protección nas vivendas do termo municipal, porta a porta.
Segundo fixeron saber os axentes da Policía Local e os voluntarios de Protección Civil, este martes 5 de maio foi unha intensa xornada de traballo, co reparto dun milleiro de máscaras nos domicilios de varios puntos do concello. O labor de subministro proseguirá ao longo destes días para chegar a todas as vivendas do concello de Rianxo e aos establecementos comerciais que están abertos ao público.
Esta distribución súmase á realizada a mediados de abril, cando se fixo chegar ás cinco farmacias radicadas no municipio 1.250 máscaras para a súa entrega, preferentemente, aos veciños de máis de 60 anos, por tratarse dun colectivo máis vulnerábel.
